2025 оны 1 сарын 13-нд Улсын Их Хурлын Эдийн засгийн байнгын хороо Монгол Улс болон Энэтхэг Улсын Экспорт-Импорт (Exim) банк хоорондын зээлийн гэрээний төслийг дэмжих эсэх асуудлыг хэлэлцэв.
Үйлдвэр, уурхай, хүнд үйлдвэрийн сайд Туваан Цэвэгдорж уг төслийг танилцуулж, “Монгол Улс Энэтхэгийн Exim банкнаас олгосон хөнгөлөлттэй зээлийн санхүүжилтээр нефть боловсруулах үйлдвэрийн төсөл хэрэгжүүлж эхэлсэн. 2017, 2019 онд нийт 1.236 тэрбум ам.долларын зээлийн гэрээг УИХ баталсан. Төслийг хэрэгжүүлэх явцад “Монгол Нефть Боловсруулах” ТӨХК-ийн зардал 462.2 сая ам.доллароор нэмэгдсэн бөгөөд үүнийг 2023 оны 9 сард УУХҮЯ-ны Уул уурхайн экспертүүдийн зөвлөлийн хурлаар хэлэлцэж, нийт зардлыг 1.698 тэрбум ам.доллар болгон баталсан. Тиймээс нэмэлт санхүүжилтийн асуудлаар Энэтхэгийн Exim банктай яриа хэлцэл хийж байна” гэжээ.
Энэтхэгийн талаас санал болгож буй 464 сая ам.долларын нэмэлт санхүүжилт нь EPC-4 багцын ажилд зарцуулагдах бөгөөд 2019 онд батлагдсан 236 сая ам.долларын зээлийн гэрээний нөхцөл өөрчлөгдөж, шинэ зээлийн гэрээний хэмжээ 700 сая ам.доллар болж нэмэгдэх юм. Энэтхэгийн талын өмнөх гэрээний нөхцлүүдэд гурван шинэ шаардлага нэмэгдэхээр болжээ. Үүнд, төсөлд нэмэлт санхүүжилт хэрэгтэй бол Монгол Улс санхүүжилт гаргах, төсөлд орлогыг “Монгол Нефть Боловсруулах” ТӨХК-ийн Монгол дахь банкны дансанд шилжүүлэх, Засгийн газар зээлийн гэрээг биелүүлээгүй, зээлийг хугацаанд нь төлөөгүй тохиолдолд “Монгол Нефть Боловсруулах” ТӨХК-ийн дансыг хураан авч, төлбөрийг шууд компанийн орлогоос гаргах, мөн Exim банк зээлийн гэрээний хүчинтэй байх хугацаа буюу 2040 он хүртэл болон төлбөр бүрэн төлөгдөх хүртэл компанийн орлогын талаар зөвлөгөө өгнө.
Нэмэлт санхүүжилтийн зээлийн гэрээ нь өмнөх гэрээнүүдтэй адилаар 1.75 хувьтай жилийн хүүтэй, үйлчилгээний хураамж болон хөрөнгийн баталгааны хураамж 0.5 хувьтай, 5 жилийн үндсэн хүүгүй хугацаатай бөгөөд нийт 20 жилийн хугацаанд төлөгдөх юм. Энэ зээлийн гэрээ нь Засгийн газрын 2024-2028 оны үйл ажиллагааны хөтөлбөрт багтсан 14 томоохон төслийн нэг болох Нефть боловсруулах үйлдвэрийн төслийг дуусгахад чухал ач холбогдолтой.
Эдийн засгийн байнгын хорооны хуралдаанд 17 гишүүний 12 нь Монгол Улс болон Энэтхэг Улсын Экспорт-Импорт банк хоорондын зээлийн гэрээний төслийг дэмжих саналаа өгчээ. Тиймээс Эдийн засгийн байнгын хорооны дүгнэлтийг Төсвийн байнгын хороо болон Аюулгүй байдал, гадаад бодлогын байнгын хороонд хүргүүлэхээр болсон.
