Жил бүрийн 11 дүгээр сарын 25-наас 12 дугаар сарын 10-ны хооронд дэлхийн улс орнууд “Нэг зорилгын төлөө нэгдье” сэдвийн дор Жендэрт суурилсан хүчирхийллийн эсрэг 16 хоногийн аяныг тэмдэглэн өнгөрүүлдэг.
Монгол Улсын 2024 оны парламентын сонгуулиар нийт гишүүдийн 25 хувийг бүрдүүлж, 32 эмэгтэй сонгогдсон нь түүхэн дэвшил байж, шийдвэр гаргах түвшинд эмэгтэйчүүдийн төлөөллөөр Монгол Улс Азид тэргүүлэгч боллоо.
Салбарын сайдын хувьд би Монгол Улс Үндсэн хуулийн шинэчлэлийн зарчмуудын дагуу шийдвэр гаргах түвшинд эмэгтэйчүүдийн оролцоо цаашид улам бүр нэмэгдэнэ гэдэгт итгэлтэй байна.
2019-2024 оны хооронд Монгол Улс жендэртэй холбоотой асуудлуудыг шийдвэрлэх чиглэлд ихээхэн ахиц дэвшил гаргасан. Сүүлийн хоёр жилийн хугацаанд гэр бүлийн хүчирхийллийн тоо харьцангуй буурсан хэдий ч эдгээр үр дүн хангалттай хэмжээнд хүрээгүй байна.
Цаашид бид эмэгтэйчүүдийн амжилт гаргах боломжийг бүрдүүлэхэд анхаарч, хөдөлмөр эрхлэлтийг дэмжих, боловсролын хүртээмжийг сайжруулах, хүний эрх, тэгш байдлын талаарх мэдлэгийг нэмэгдүүлэхэд голлон төвлөрнө. Эдгээр хүчин чармайлтаар эмэгтэйчүүдийг хүчирхийлэл, ялгаварлалгүй орчинд амьдрах боломжийг хангана.
Монгол Улсын урт хугацааны хөгжлийн бодлого “Алсын хараа 2050,” Сонгуулийн тухай хууль, Нийгмийн даатгалын багц хууль, Хөдөлмөрийн тухай хуулийн нэмэлт өөрчлөлтүүд, Хүүхэд хамгааллын тухай хуулийн шинэчилсэн найруулга зэрэг гол хуулийн баримт бичгүүд жендэрийн тэгш байдал, эмэгтэйчүүдийг чадавхжуулах эрх зүйн орчныг бэхжүүлсэн.
Жендэр нь зөвхөн эмэгтэйчүүдийн асуудал биш гэдгийг онцлох нь зүйтэй. Хүн бүрийг хүчирхийлэл, ялгаварлалгүй орчинд хамгаалах, хүртээмжтэй байдал, хүний эрхийг бүх түвшинд хангахад бид хамтран ажиллах ёстой.
Хөдөлмөр, нийгмийн хамгааллын сайд Л.Энх-Амгалан ярихдаа, “Жендэрийн тэгш байдлыг хангаж, эмэгтэйчүүдийн эдийн засгийн чадавхыг нэмэгдүүлэх нь эмэгтэйчүүдийг хамгаалах чухал стратеги юм” хэмээн онцолж, яамны бодлого, тэргүүлэх чиглэлийг илэрхийллээ.
