Өглөөний 08:50 цагийн үед Багшийн дээдийн автобусны буудал сэлүүхэн байлаа. Санхүү Эдийн Засгийн Их Сургуулиас эхлээд Арслантай гүүр, Багшийн дээдийн уулзвар хүртэл нийтийн тээврийн автобуснууд хөдөлгөөнд орсон байна.
Сурагчдын амралт ба түгжрэл
М:1 Таван шар-Офицеруудын ордон чиглэлийн автобусанд зорчиж явсан Г.Нараа “Өнөөдөр өглөө замын ачаалал багассан нь анзаарагдлаа. Улаанхуарангаас хотын төв орж ирэхэд өдөр бүр хоёр цаг зарцуулдаг байсан. Харин өнөө өглөө 20-30 минут л явлаа. Бага ангийн сурагчид амарсан учраас түгжрэл буурсан болов уу” гэж ярилаа.
Судалгаагаар, сурагчдын сургуульдаа ирж, явах хөдөлгөөнөөс шалтгаалж Улаанбаатар хотын түгжрэл 20-40 хувь нэмэгддэг гэж тогтоосон байдаг. 2024 оны сурагчдын эхний амралт энэ долоо хоногоос эхэлж байгаа бөгөөд иргэд өглөөний ачаалал тодорхой хэмжээнд буурсан гэж хэлж байна.
07:00-09:00 цагийн хооронд хамгийн их түгжрэлтэй байдаг
Өглөөний оргил цаг буюу 07:00-09:00 цагийн хооронд хотын төвийн Их тойруу, баруун, зүүн, урд бүсүүдэд хөдөлгөөний хурд 20-40 хувиар буурдаг. Их тойрууд 30 хувь, баруун бүс 19 хувь, зүүн бүс 20 хувь, Зайсан орчим 39 хувь буюу хамгийн их түгжрэлтэй бүсээр тодорхойлогддог байна.
Автобусны жолооч нарын санал
Ч:2 чиглэлийн автобусны жолооч С.Даваажав “Сурагчдын амралт эхлэхээр өглөөний хөдөлгөөн багасдаг. Түгжрэл багассанаар автобус хуваарийн дагуу явдаг. Оюутнууд амарвал бүр сэлүүхэн болно” гэж хэлэв.
Шинэ жилийн баяр ба оройн түгжрэл
Оройн оргил цагийн түгжрэл шинэ жилийн баяртай холбоотойгоор нэмэгджээ. Иргэн О.Хандмаа “Өглөө, оройдоо түгжрэл багасвал цаг хэмнэхэд их нэмэртэй. Гэвч оройн оргил ачаалал хэвээр байгаа нь ажиглагдаж байна” гэлээ.
Улсын их дэлгүүр, Улаанбаатар их дэлгүүр зэрэг худалдааны төвүүдийн ачаалал их байгаа бөгөөд хөл хөдөлгөөн тасрахгүй байна. Машины жолооч Х.Үүрцайх “Баярын ойртсонтой холбоотой замын ачаалал хаа сайгүй их байна” гэж ярилаа.
Дүгнэлт
Сурагчдын амралт эхэлсэн нь өглөөний ачааллыг бууруулж байгаа хэдий ч шинэ жилийн баяртай холбоотойгоор оройн түгжрэл хэвээр байна. Ирэх өдрүүдэд түгжрэл нэмэгдэх төлөвтэй байгаа ажээ.
