Улаанбаатар хотын метроны төслийн хүрээнд 2024 оны тавдугаар сард Энхтайваны өргөн чөлөө дагуу инженер-геологийн судалгааны 40 цэгийг тэмдэглэжээ.
Бүгд Найрамдах Солонгос Улсын “Dohwa Engineering” консорциум метроны техник, эдийн засгийн үндэслэлийг 2-3 үе шаттайгаар боловсруулах инженер, геологийн ажлыг гүйцэтгэнэ. Эхний шатанд төлөвлөсөн чиглэлийн дагуу газрын гадаргын геологийн болон газарзүйн шинж чанарыг бүртгэн авч, газрын 30 метрийн гүнд туннелийн төхөөрөмж байрлуулан, анхны мэдээлэл цуглуулах ажлыг хийнэ.
Эхний ээлжинд геологийн судалгааны өрөмдлөгийг гурван байршилд эхлүүлээд байна. Тухайлбал, Улаанбаатар хотын зүүн хэсэгт байрлах Чулуун овооны тойрог, Сүхбаатарын талбайн урд талд Блю Скай тауэрын ойролцоо, мөн хотын баруун хэсэгт Таван шарын Улзий автобусны буудлын ойролцоо өрөмдлөг хийгдэж байна. Хоёрдугаар шатанд метроны нарийвчилсан техник, эдийн засгийн үндэслэлийг боловсруулах бөгөөд өрөмдлөгийг 30, 50, 70 метрийн гүнд хийхээр төлөвлөж байна.
Мөн 2025 оны нэгдүгээр сарын 12-ны өдөр Монгол Улсын нийслэлийн Засаг дарга Хишгээгийн Нямбаатар Улаанбаатар хотын метроны төсөлд Британийн Засгийн газар баталгаа гаргах болсныг мэдэгдлээ. Засаг дарга иргэдийн төслийн хэрэгжилтэд эерэг хандлага үзүүлж буй нь төслийн үйл ажиллагааг хугацаанд нь дуусгахад хувь нэмэр оруулна гэж онцоллоо.
