Юньань мужийн Жаотун тосгоны бага сургуулийн сурагч сошиалд “мөсөн жаал” гэх нэрээр од болсон. Тарчигхан амьдралтай хэдий ч 100 онооны шалгалтад 99 авч өдөр бүр гэрээсээ сургууль хүртэл 4.5 км хүнд хэцүү замыг алхаж ирдэг нь олныг гайхшируулсан юм. Нүүр нь улайж, үс, сормуус нь битүү цантсан хүүг багш нь өхөөрдөж бас өрөвдөхдөө зургийг нь дарсанаар дэлхий бяцхан жаалыг таних болсон.
Ээж нь орхиж явсан, аав нь том хотод ажил хийдэг жаал хүү хөдөөгийн ядуу тосгонд эмээ, үеэл эгчтэйгээ амьдардаг ажээ. Аав нь хол ажиллахаар явахдаа хүүдээ халаасандаа байсан таван юанийг үлдээсэн байна. Хүү тэр мөнгийг одоо болтол үрээгүй бөгөөд ”Аавыгаа өвчин тусах үед эмчлэхээр хадгалж байгаа” гэж ярьсан нь үзэгчдийн сэтгэлийг хөдөлгөжээ.
Коммунист залуучуудын байгууллагаас “мөсөн жаал”-д бол сургуульд нь 100,000 юань буюу 15,000 ам.доллартай тэнцэх мөнгө хандивласныг орон нутгийн удирдлагууд сургууль дээр нь аваачиж өгсөн аж. Мөн нэгэн компани хүүд болон хүүгийн ангийн сурагчдад бүгдэд нь өвлийн хувцас бэлэглэснээс гадна сургуульд нь халаалтын төхөөрөмж хандивласан байна. Тус компани мөн хүүгийн аавд ажил санал болгосон тул алдарт ”мөсөн жаал” цаашид аавтайгаа хамт байх боломжтой болоод байна.
Саяхан орон нутгийн телевиз хүүгийн тухай нэвтрүүлэг бэлтгэсэн нь олон хүнд таалагдсан бөгөөд хүү телевизээр үг хэлэхдээ “Хүмүүс надад зөндөө бэлэг, гоё зүйл өгсөн” хэмээн ярьжээ.
