Ахмадуудын Үндэсний чуулган 2024 оны 1-р сарын 8-нд Төрийн ордонд УИХ-ын даргын ивээл дор зохион байгуулагдлаа.
Энэхүү Үндэсний чуулганд 21 аймаг болон нийслэлийн есөн дүүргээс 900 орчим ахмад настан оролцсон бөгөөд УИХ, Хөдөлмөр, нийгмийн хамгааллын яам, Монголын Ахмадын Холбоо хамтран зохион байгуулжээ.
Чуулганы нээлтэд УИХ-ын дарга Д.Амарбаясгалан үг хэлж, ахмадуудын нийгмийн асуудлыг өнөөгийн нөхцөл байдал болон ирээдүйн чиг хандлагад нийцүүлэн цогц шийдвэрлэхийн тулд ахмад настны эрүүл мэнд, тэтгэвэр, хөдөлмөр эрхлэлт, идэвхтэй амьдрал, нийгмийн оролцоо, эрхийг хамгаалах асуудалд анхаарах шаардлагатайг онцлов. Тэрээр холбогдох яамд, байгууллагууд болон бүх шатны албан тушаалтнуудад хуулиар хүлээсэн үүргээ чанд биелүүлэхийг уриаллаа.
“Халамжаас хөдөлмөр эрхлэлтийн бодлого руу” хүрээнд ахмадуудын хөдөлмөр эрхлэлтийг дэмжих хуулийн орчин бүрдсэн бөгөөд Ахмад настны тухай хуульд оруулсан нэмэлт, өөрчлөлт нь хөдөлмөр эрхлэлтийг дэмжихэд чиглэгдсэн. Одоо хууль хэрэгжүүлэхэд бүх тал хүчин чармайлт гаргах шаардлагатай. Засгийн газар болон хувийн хэвшлийн байгууллагууд бүгд хууль биелүүлэх үүрэгтэй” хэмээн УИХ-ын дарга онцлов. Мөн ахмадын холбоодыг хуулийн хэрэгжилтийн талаар мэдээлэл өгч, хяналт тавьж ажиллахыг хүсэв.
Чуулганы үеэр Хөдөлмөр, нийгмийн хамгааллын сайд Л.Энх-Амгалан 2025 оны 1-р сарын 1-нээс хэрэгжиж эхэлсэн Ахмад настны тухай хуульд оруулсан нэмэлт, өөрчлөлт болон ахмадуудын талаарх төрийн бодлогыг танилцуулж, нийгмийн даатгалын шинэчлэлийн талаар онцлон дурдлаа. “Нийгмийн даатгалын шинэчлэлийн хүрээнд хувийн нэмэлт тэтгэврийн эрх зүйн орчныг бүрдүүлэхээр ажиллаж байна. Үүний үр дүнд тэтгэврийн хуваарилалтын системээс хагас хуримтлалын системд шилжих, ахмадууд олон эх үүсвэрээс тэтгэвэр авах боломж бүрдэх зэрэг эерэг өөрчлөлтүүд бий болно. Ахмадуудын авч буй тэтгэвэр тэдний хэрэгцээнд хүрэлцээтэй байх ёстой. 2025 оны 1-р сарын 1-нээс эхлэн нийгмийн даатгалын шимтгэлийн хоёр хувийг тэтгэврийн хуримтлалын санд хадгалах зохицуулалт хийгдэнэ. Олон жил яригдсан ахмадын санг бодитоор хэрэгжүүлж эхэлж байна” гэж сайд хэлэв.
Ахмад настны тухай шинэчилсэн хуульд дараах шинэ зохицуулалтууд багтсан байна. Үүнд:
- Байгууллага, аж ахуйн нэгжүүд нийт ажиллагсдынхаа хоёр хувиас багагүй ахмад настныг ажиллуулах,
- Ахмадууд өөрийн хүсэлтээр тэтгэвэрт гарах боломжтой байх,
- Тэтгэвэр авагч нас барсан тохиолдолд тэтгэврийн 20 хувийг амьд байгаа ханьд нь нэмж олгох,
- Тэтгэврийн хэмжээг инфляцтай уялдуулан жил бүр нэмэгдүүлэх,
- Ажил эрхэлж буй ахмад настнууд нийгмийн даатгалын шимтгэл төлөх эсэхээ өөрсдөө шийдэх эрхтэй болох зэрэг зохицуулалтууд багтжээ.
