Италийн Турин хотноо 2025 оны нэгдүгээр сарын 13-23-ны өдрүүдэд зохион байгуулагдаж буй XXXII өвлийн дэлхийн оюутны спортын наадамд Монгол Улсаас 12 тамирчин 5 төрлөөр оролцож байна.
2025 оны FISU-гийн өвлийн дэлхийн оюутны спортын наадамд 57 орны 2,000 орчим тамирчин 11 спортын төрөлд 96 багц медалийн төлөө өрсөлдөж байгаа бөгөөд Монголын баг тамирчдыг 4 дасгалжуулагч удирдан оролцуулж байна.
Б. Гэрэлтуяа, Э. Мөнх-Эрдэнэ, Г. Мөнх-Эрдэнэ, М. Борхүү нар богино замын тэшүүрийн төрөлд Б. Бат-Оргил дасгалжуулагчийн удирдлага дор өрсөлдөх бол О. Мишээл уран гулгалтын төрөлд Тэцүкатсу Накашима дасгалжуулагчийн хамт оролцоно.
Цанын төрөлд О. Золбаяр, А. Хүслэн, Б. Номин-Эрдэнэ нар Д. Баттулга дасгалжуулагчийн удирдлага дор, харин уулын цанын төрөлд А. Сондорбаяр, О. Үсух-Ирээдүй, А. Итгэл нар С. Тэмүүлэн дасгалжуулагчийн удирдлага дор улсаа төлөөлөн оролцож байна. Эцэст нь Г. Ганзориг сноуборд төрлөөр өрсөлдөж байна.
Монголын тамирчдаас Г. Ганзориг өвлийн оюутны спортын наадамд сноуборд төрлөөр өрсөлдөж буй анхны Монгол тамирчин болж байна. Тэрээр энэ спортын төрлөөр Монголын гурав дахин аварга бөгөөд Ардын Спортын Их Наадмын алт, мөнгөн медальт тамирчин юм.
