2024 оны арванхоёрдугаар сарын эцсийн байдлаар Монгол улсын үндэсний валют болох төгрөгийн хадгаламж 22.1 их наяд төгрөгт хүрч, 2023 оны мөн үетэй харьцуулахад 4.9 их наяд төгрөгөөр нэмэгджээ.
Төгрөгийн нийт хадгаламжаас 19 их наяд төгрөгийг иргэд, 3.1 их наяд төгрөгийг аж ахуйн нэгжүүд бүрдүүлж байна.
Гадаад валютын хадгаламж 4.9 их наяд төгрөгт хүрч, өмнөх оны мөн үетэй харьцуулахад 142.6 тэрбум төгрөгөөр буюу 2.9 хувиар буурсан байна.
2024 оны арванхоёрдугаар сарын эцсийн байдлаар аж ахуйн нэгжүүд, байгууллагууд, иргэдэд олгосон нийт зээлийн үлдэгдэл 37 их наяд төгрөгт хүрч, 2023 оны мөн үетэй харьцуулахад 9.7 их наяд төгрөгөөр буюу 35.3 хувиар нэмэгдсэн байна.
Зээлийн үлдэгдлийн бүтэц нь дараах байдалтай байна:
- 61.0 хувь нь иргэдийн зээл,
- 36.5 хувь нь хувийн хэвшлийн байгууллагуудын зээл,
- 1.2 хувь нь төрийн байгууллагуудын зээл,
- 1.2 хувь нь санхүүгийн байгууллагуудын зээл эзэлж байна.
Гүйцэтгэж буй зээлийн үлдэгдэл 33.9 их наяд төгрөгт хүрч, 2023 оноос 9.8 их наяд төгрөгөөр нэмэгдсэн байна. Гүйцэтгэж буй зээлийн үлдэгдэл нийт зээлийн үлдэгдлийн 91.5 хувийг эзэлж байна.
Хяналтын жагсаалтад байгаа зээлийн үлдэгдэл 1.3 их наяд төгрөгт хүрч, өмнөх оноос 6.3 тэрбум төгрөгөөр буюу 0.5 хувиар нэмэгдсэн байна. Хяналтын жагсаалтад байгаа зээл нийт зээлийн үлдэгдлийн 3.5 хувийг эзэлж байна.
Төлбөрийн чадваргүй зээлийн үлдэгдэл 1.9 их наяд төгрөгт хүрч, өнгөрсөн оноос 172.6 тэрбум төгрөгөөр буурсан байна. Төлбөрийн чадваргүй зээлийн үлдэгдэл нийт зээлийн үлдэгдлийн 5.1 хувийг эзэлж байна.
2024 оны арваннэгдүгээр сарын эцсийн байдлаар иргэдэд олгосон орон сууцны зээлийн үлдэгдэл 9.2 их наяд төгрөгт хүрч, 2023 оны мөн үетэй харьцуулахад 1.8 их наяд төгрөгөөр нэмэгдсэн байна. Орон сууцны зээлийн үлдэгдлийн 97.7 хувь нь гүйцэтгэж буй зээл, 1.4 хувь нь хяналтын жагсаалтад байгаа зээл, 0.9 хувь нь төлбөрийн чадваргүй зээл эзэлж байна.
