Монгол Улсын Ерөнхий сайд У.Хүрэлсүх Баян-Өлгий аймагт ажиллаж байна. Тэрээр төрийн албан хаагчидтай уулзахдаа төрийн байгууллагын бүх шатанд сахилга, хариуцлага тогтоох, энэ талаар Засгийн газраас гаргасан Албан даалгаврыг ягштал мөрдөж, хуулиар хүлээсэн үүргээ биелүүлж ажиллахыг үүрэг болгов.
Иргэдээ сонсож, тэдэнд үйлчилж, санал, хүсэлт, гомдлыг нь цаг алдалгүй барагдуулж, хариуг нь заавал өгч байхыг анхаарууллаа. Төрийн албан хаагчийн ажлыг хагас, бүтэн жилээр дүгнэж, сайн ажилласныг урамшуулах, хангалтгүй дүн үзүүлсэн бол хариуцлага тооцох, төрийн албаныхныг муухай харагдуулж байгаа авлигаас ангид байж, ард түмний итгэл найдварыг алдахгүйн төлөө хичээж ажиллахыг захив.
“Асуудал шийддэг, шударга, ёс зүйтэй, төр, иргэдийн төлөө хоёргүй сэтгэлээр ажилладаг даргыг бүх талаар дэмжиж, хамтран ажиллана. Дарга хүн За, эсвэл үгүй гэж хариулж чаддаг байх хэрэгтэй” гэв. Мөн улсын төсвийн хөрөнгө оруулалтаар хийх бүтээн байгуулалтын ажлаа цаг алдалгүй эхэлж, хугацаанд нь, чанартай дуусгахыг сануулав.
Баян-Өлгий аймагт эмнэлгийн барилга хамгийн тулгамдсан асуудал болсон байна. 1974 онд ашиглалтад орсон Нэгдсэн эмнэлгийн барилга хуучирч муудан, шаардлага хангахгүй болжээ. Иймээс энэ жил 50 ортой хүүхдийн эмнэлэг барьж, 2019 оны төсөвт 250 ортой эмнэлэг, 250 хүүхдийн цэцэрлэг барих хөрөнгийг тусгахаар Монгол Улсын Ерөнхий сайд У.Хүрэлсүх шийдвэрлэлээ.
Тэрээр аймгийн эмнэлгийн эмч, ажиллагсадтай уулзахдаа Засгийн газар эрүүл мэнд, боловсролын салбарт онцгой анхаарч байгааг хэлэв. 97 сургууль, 127 цэцэрлэг барьснаар гурван ээлжээр хичээллэдэг сургуульгүй болж, хүүхэд бүр цэцэрлэгт хамрагдана, эцэг, эхчүүд хүүхдээ цэцэрлэгт өгөх гэж азын сугалаанд найдах шаардлагагүй болно гэлээ.
Аймгийн удирдлага Ховд голын дээгүүр төмөр бетон гүүр барих, хатуу хучилттай зам тавих, Казахстан руу хийж байсан нислэгийг сэргээх, түрээсийн байранд үйл ажиллагаа явуулдаг төрийн 10 байгууллагыг өөрийн гэсэн байртай болгох, Асгатын мөнгөний орд, Түргэний шохойн ордыг түшиглэн цементийн үйлдвэр барих, шинээр сум байгуулахад Засгийн газрын зүгээс дэмжлэг үзүүлэхийг хүсэв. Эдгээр асуудлыг аль болох боломжтой байдлаар шийднэ гэдгээ Ерөнхий сайд У.Хүрэлсүх хэллээ.
Баян-Өлгий аймаг 103 мянган хүн амтай. 13 сум, нэг тосгонтой. Аймгийн төв Өлгий хотод 35 мянга орчим хүн оршин суудаг. 2,2 сая малтай. Энэ онд улсын төсвийн хөрөнгө оруулалтаар 27,5 тэрбум төгрөгийн 23 төсөл, арга хэмжээ хэрэгжүүлэхээр төлөвлөсөн байна.
