Монгол хэл сонирхон суралцагчдыг дэмжих, залуу судлаачдын анхаарал, сонирхлыг Монгол судлалд хандуулах зорилгоор
БНЭУ-д суугаа Элчин сайдын яам, БНЭУ-ын Жавахарлал Неругийн Их сургуулийн докторант, Монгол хэлний багш Л.Өлзийт нар хамтран 2018 оны гуравдугаар сарын 15-нд “Ehipassiko Mongolia” буюу “Монгол урьж байна” сэдэвт Монгол судлаачдын бага хурлыг Шинэ Дэли хотноо зохион байгуулав.
БНЭУ-ын анхны Ерөнхий сайд Жавхарлал Неругийн нэрэмжит их сургуульд олон жилийн тэртээ Монголын эрдэмтэн багш нар уригдаж ажиллаж, монгол хэл заадаг, Монгол нийгэм-улс төрийг судалдаг байсан.
Сүүлийн жилүүдэд тасарсан энэхүү уламжлалыг сэргээхээр тус улсад суугаа Элчин сайдын яам санаа тавьж ажилласны үр дүнд Гадаад хэлний сургуулийн Зүүн Азийн төв 2016 онд хичээлийн нэг жилийн хугацаатай монгол хэл сургалтыг дахин нээж, суралцахыг хүссэн их дээд сургуулийн багш нар, судлаачид, худалдаа, бизнес эрхлэгчид, оюутан залуусыг элсүүлсэн бөгөөд 2018 онд уг сургалтын түвшинг дээшлүүлж, хугацааг нь хоёр болгож өргөжүүлсэн юм.
Бага хуралд Жавхарлал Неругийн их сургуулийн Хэлний сургуулийн Азийн судлалын төвийн эрхлэгч пр.Шарад К.Сони, Зүүн Азийн хэлний төвийн эрхлэгч др.Вижайяанти Рагван, монголч эрдэмтэн проф. Лари Азад, Дели Их сургуулийн “Камла Неру” коллежийн захирал асан др.Рита Малхотра, эдийн засагч др.Мароор А.Бег, НҮБ-ын ажилтан Ражендра К.Ахужа, удамшил зүйч др.Хари В.Чаудхури, Делийн их сургуулийн багш др. Викас Сингх, соёл судлаач др.Рамкишор Махолья болон монгол хэл суралцаж байгаа оюутнууд, Монгол Улсын түүх, нийгэм улс төр, эдийн засгийг судалж магистр, докторын зэрэг горилогчид оролцов.
Бага хурал гурван салбар хуралдаантай явагдаж, “Энэтхэг, Монголын харилцааны эхэн үе: Монгол бичиг үсгийн түүх”, “Монгол дахь Энэтхэгийн утга зохиол судлал”, ”Монголын соёлын ерөнхий байдал”, “Монголчуудын баяр, тэмдэглэлт үйл явдлууд”, “Шинэ төмөр зам төсөл”, “Монгол үндэстэн”, “Монголын нийгэм, соёлын харьцуулсан судалгаа”, ”Монголын Буддын соёлын онцлого”, “Монголын үндэсний аюулгүй байдлын бодлого”, “Монгол хэл”, “Монголын нийгэм улс төрдахь эмэгтэйчүүдийн байр суурь: 1921 оны Ардын хувьсгал”, “Монголын эдийн засаг, бизнесийн орчин”, “Аялал жуулчлал”, ”Энэтхэг, Монголын худалдааны харилцаа”, ”Монгол дахь нийгмийн сүлжээ” зэрэг нийт 15 илтгэл хэлэлцсэн юм. Мөн проф. Лари Азадын бичсэн “Дорноос Өрнийг чиглэл соёл иргэншил”, др. Рита Малхотра англи хэлнээ хөрвүүлсэн “Монгол яруу найрагч Хадаа Цэндоогийн ертөнц” зэрэг номыг танилцууллаа.
Монгол Улсаас БНЭУ-д суугаа Онц бөгөөд Бүрэн эрхт Элчин сайд Г.Ганболд бага хуралд оролцож, “Монгол, Энэтхэгийн харилцааны түүхэн уламжлал, өнөөгийн байдал, ирээдүйн төлөв” сэдвээр ярьж, их зохиолч Д.Нацагдоржийн “Энэтхэг бүжигчин бүсгүй “ гэдэг шүлгийг англи, хинди хэлээр орчуулсанаа уншиж сонсгожээ.
