Олон Улсын Валютын Сан (ОУВС)-аас Монголбанкны төв банкны үйл ажиллагааг Засгийн газартай хамтран, гэхдээ бие даасан байдлаар хэрэгжүүлснээр инфляцийг амжилттай хянаж, тогтвортой эдийн засгийн өсөлтийг хангах боломжтой гэж зөвлөжээ.
Монголбанк бие даасан байдлаа сайжруулах, хууль эрх зүйн шинэчлэл хийхэд анхаарлаа төвлөрүүлэхээр төлөвлөж буйгаа зарласан байна. Олон улсын байгууллагууд болон эдийн засагчид одоогийн тогтолцоо нь төв банкны үйл ажиллагааны бие даасан байдлыг хангах хангалттай боломжгүй, мөн мөнгөний бодлогод төсвийн бодлогын нөлөө хэт их байгаа нь Монгол Улсын системийн гол дутагдал гэж онцолжээ.
Монголбанк бие даасан байдлаа тэргүүлэх зорилт болгож, шаардлагатай хууль эрх зүйн шинэчлэлийг хэрэгжүүлэх эрмэлзэлтэй байгаагаа дахин нотолсон байна.
Зарим улс орнуудын үндсэн хуульд төв банкуудыг төрийн байгууллагуудын нэг хэсэг гэж тодорхой заасан байдаг. Харин Монгол Улсын одоогийн хууль эрх зүйн хүрээнд ийм заалт байхгүй байна. Судлаачид төв банкны эрх мэдэл, үүргийг Үндсэн хуульд тусгаж оруулах нь мөнгөний бодлогыг үндэсний ашиг сонирхлын хүрээнд, бие даасан байдлаар хэрэгжүүлэх хууль эрх зүйн үндсийг бий болгоно гэж үзэж байна.
